Laž je otpušten nakon šokantnog poraza od Karabaga (2:3) na stadionu „Da Luž“, u prvom kolu grupne faze Lige šampiona.

Benfika je povela sa 2:0 već poslije 16 minuta, ali je potom doživjela potpun krah primivši tri gola, pa je azerbejdžanski tim stigao do istorijske prve pobjede u elitnom takmičenju.

„Želim da obavijestim navijače da smo se dogovorili sa Brunom Lažom o prekidu saradnje. Zahvalni smo mu na posvećenosti, ali došlo je vrijeme za promjene. Očekujemo da novi trener sjedne na klupu već u subotu protiv AVS-a,“ izjavio je Rui Košta.

Laž se prošle godine vratio u Benfiku nakon četiri godine pauze, a prethodno je klub vodio između januara 2019. i juna 2020.

Tokom „druge epizode“ donio je trofej u Liga kupu i vodio Benfiku do drugog mjesta u domaćem prvenstvu, iza Sportinga.

Ipak, početak ove sezone donio je oscilacije – tri startne pobjede, potom remi protiv Santa Klare (1:1) i sada bolan poraz od Karabaga.

Prema navodima portugalskih medija, odluka o otkazu donijeta je odmah poslije utakmice na vanrednom sastanku uprave.

Portugalski listovi ističu da je Žoze Murinjo glavni kandidat da preuzme ekipu.

Benfika je, navodno, već postigla načelni dogovor sa trofejnim trenerom, koji je nedavno dobio otkaz u Fenerbahčeu.