Bolji od „sokolića” bio je domaćin turnira, koji je do pobjede došao golovima u finišu meča – 2:0. U 81. minutu pogodio je Mihail Mocpan, dok je četiri minuta kasnije Roman Romandaš postavio konačan rezultat.

Ovo je Crnoj Gori prvi poraz na turniru, nakon pobjede nad Azerbejdžanom (1:0) u prvom kolu.

„Jako loše izdanje naših momaka, posebno u prvom poluvremenu, gdje nije postojao nikakav ritam igre. Zbog propozicija, u tom dijelu meča šansu su dobili igrači koji su u prvom kolu manje igrali. U drugom poluvremenu igra je bila za nijansu bolja, imali smo inicijativu i protivnika smo doveli do situacije da nema šut na gol. Međutim, u posljednjih desetak minuta smo napravili par vezanih kardinalnih grešaka, koje su nas na kraju koštale rezultata, kazao je selektor Vladan Savić.

U posljednjem kolu turnira, Crna Gora se 23. novembra od 9 časova po našem vremenu sastaje sa Bugarskom.