Samohrana majka srednjoškolca, brižna kćer ostarjelih roditelja i omiljena kod svakog ko je poznaje, Mirjana je došla do kioska u centru grada kako bi kupila novine.

“Dok sam kupovala novine osjetila sam da sam na nešto stala nogom. Vidjela sam novčanik, podigla ga i otvorila. Unutra je bilo više od 1.000 eura gotovine i razna dokumenta. E, onda je uslijedila potraga za tim čovjekom. Ni malo laka u prepunom Žabljaku. Potrajalo je, ali sam  preko standardizovanih brojeva mobilnih operatera došla do broja”, priča Mirjana za Antenu M.

Sa smijehom kaže da joj je, na njeno pitanje da li je nešto izgubio, odgovorio “Ne znam ko si, ti si moj anđeo”.

“Našli smo se na dogovorenom mjestu. Ja sam mu predala novčanik i malo smo popričali. Sudbina ili ko zna šta, kazao mi je da je došao da traži posao i da je već razgovarao sa mojom braćom koji su vlasnici restorana. I da će tu početi da radi tokom sezone.

“Mlad i lijepo vaspitan momak, ponudio mi je novčanu nagradu ali sam ja odbila. Taj njegov ozareni osmjeh i  spontan zagrljaj najveća su mi nagrada” kaže Mirjana.