Proljeće polako stiže u Podgoricu, a sa njim i novi život u Urbanoj bašti u Tološima. Ovih dana volonteri i djeca okupili su se da zasade povrće i voće, nastavljajući tradiciju organskog uzgoja hrane koja, pored zdravih plodova, pomaže i onima kojima je najpotrebnije.
“Proljeće samo što nije stiglo, mi smo već u prethodnim nedjeljama na akcijama posijali luk, spanać, šargarepu, rotkvice. Prošle nedjelje smo zasijali rasad za plastenik. Mi još uvijek imamo povrće koje smo još jesenas zasijali, čak smo nešto i brali i donirali, nešto spanaća, blitve i raštana. Donaciju vršimo preko NVO Nova nit koja plodove koje mi uberemo donira građanima koji su u stanju socijalne potrebe. Princip je da jednom mjesečno organizujemo tu donaciju, a drugim akcijama svi volonteri koji dođu mogu da uberu”, navela je Volonterka Urbane bašte Ana Vuković
Pored novih sadnica, u Urbanoj bašti još uvijek se mogu pronaći i plodovi iz zimske sezone. Naša sagovornica objašnjava kako se ova hrana prikuplja i dijeli socijalno ugroženim porodicama i Narodnoj kuhinji, pokazujući da bašta nije samo mjesto uzgoja, već i mjesto solidarnosti i zajedništva.
Opširnije u prilogu:
