Vitamin C važan je za stvaranje kolagena, pomaže apsorpciju gvožđa iz biljnih namirnica i doprinosi normalnom radu imunološkog sistema. U nastavku donosimo pet namirnica koje ga, prema podacima za 100 grama svježeg proizvoda, sadrže više od limuna.
1. Crna ribizla – 181 miligram
Na prvom mjestu nalazi se crna ribizla, čijih 100 grama sadrži čak 181 miligram vitamina C. Njene bobice imaju izražen, kiselkast ukus, pa ih možete dodati u jogurt ili ovsenu kašu. Dobro se slažu i sa slađim voćem, poput banane.
2. Crvena slatka paprika – 127,7 miligrama
Crvena paprika sadrži oko 2,4 puta više vitamina C od limuna. Možete je jesti svježu, narezanu na trakice, dodati u salatu ili poslužiti uz humus. Posebno je korisna u obrocima sa biljnim izvorima gvožđa jer vitamin C pomaže njegovu apsorpciju.
Zeleni kivi takođe je odličan izvor vitamina C. Na 100 grama sadrži oko 40 miligrama više ovog vitamina nego limun. Možete ga jesti samostalno ili dodati u voćnu salatu, posebno u kombinaciji sa kruškom i bananom.
4. Brokoli – 89,2 miligrama
Sirovi brokoli sadrži gotovo 90 miligrama vitamina C na 100 grama. Ako više volite kad je termički obrađen, preporučuje se priprema na pari. Dugotrajno kuvanje može smanjiti količinu vitamina C, pa je važno voditi računa o načinu pripreme.
5. Prokelj – 85 miligrama
Ni prokelj ne zaostaje za drugim namirnicama sa ove liste. Sirov sadrži 85 miligrama vitamina C na 100 grama. Može se tanko narezati i pomiješati sa jabukom i orasima, a kao dodatak salati dobro će poslužiti maslinovo ulje i malo limunovog soka.











