Na jednoj od lokacija u Podgorici koju je obišla ekipa Media Biroa mogu se pronaći metarska drva, balvani, cokovi i cijepana drva. Ipak, kako navodi jedan od prodavaca, kupaca je sve manje.

„Bukova cijepana drva koštaju 90 eura po metru, dok su cerova 100 eura. Iz godine u godinu manja je potražnja. Pretežno kupe tri metra cijepanih drva za cijelu sezonu grijanja. Ranije se kupovalo i do 12 metara za cijelu sezonu. To se promijenilo kada je počelo grijanje na klimu i solarne panele“, kazao je prodavac za Media Biro, koji nije želio pred kameru.

Prema njegovim riječima, drva danas uglavnom kupuju stariji sugrađani, dok mlađa populacija sve češće bira druge načine, poput klima i peleta.

Promjene u navikama potvrđuju i odgovori naših sagovornika. Za većinu je grijanje na struju najpraktičnije i najpovoljnije rješenje.

Ipak, tradicionalni način grijanja nije u potpunosti iščezao. Dio građana i dalje se odlučuje za drva i “grijanje na šporet”.