Ove godine metarska bukova drva prodaju se od 65 do 70 eura, dok je hrast 80 eura. Prošle godine drva po metru koštala su od 60 do 65 eura. P

oskupila su i cijepana drva, te se sada prodaju od 90 do 95 eura, a u isto vrijeme prošle godine mogla su se kupiti od 75 do 80 eura.

Prodavci kažu da su drva sa područja Veruše, Mateševa, Kolašina, Mojkovca i Berana, kao i da se cijena od septembra neće mijenjati.

Oni ističu da građani najviše kupuju bukvu, te da je prodaja ove godine slabija nego prošle.

Pojedini građani ipak su odlučili da se već sada obezbijede, jer strahuju da će za par mjeseci cijene biti znatno veće.

Sugrađanka Rosanda Bulatović kaže da će se ove godine grijati na struju.

“Grijanje na struju jeste skupo, ali ni drva nijesu jeftina. Ako neko odluči da se grije na drva mora ih kupiti, a pritom zimus će dodatno plaćati i struju, tako da ne znam šta se više isplati. Koliko čujem drva su skupa ove godine. Nijesam baš upoznata sa cijenom, jer ih ne kupujem, ali kažu mi poznanici da su skupa”, kazala je Bulatović.

Na struju će se ove zime grijati i Vladimir Tumbaković.

“Nemam mogućnost grijanja na drva, tako da ću se i ove zime grijati na struju. Imam četiri klime i to će biti dovoljno za grijanje. Ne znam koliko se drva prodaju ove godine, ali grijanje na klimu nije skupo”, kaže Tumbaković.